Fem reisetips til Bergen by

Tre fine hotell til budsjettet ditt

Skal du bruke tid til å bli godt kjent med den herlege vestlandsbyen, er det godt å ha ein fin stad å vere nokre netter. Her har vi testa ut tre ulike hotell til tre ulike prisklassar, for deg som held deg til budsjett, likar det vesle ekstra og deg som verkeleg likar ekstra luksus.

Zander K

Rett ved både tog- og busstasjonen, finn du Zander K. Det er billegast og ligg absolutt nærast, perfekt når du ikkje vil slepe med deg bagasjen langt. Her får du det du treng, når hovudfokuset er å vere ute på farten. Romma er i skandinavisk stil, sengene gode og frokostbuffeten heilt nydeleg med godt utval.

📍 Zander Kaaes gate 8⁠Ekstern lenke

Charmante Skostredet Hôtell

Eit stykke lenger opp i gata finn du dette uvanlege hotellet. Charmante Skostredet Hôtell er for deg som elskar detaljar, gjennomtenkt interiørdesign og maksimalisme.

Med inspirasjon frå 1900-talets Paris er kvart rom unikt med mykje fargar, tapet og med mange unike detaljar. Senk skuldrene til lyden av fransk jazz som blir spela i bakgrunnen på rommet ditt. Frukosten her bestiller du frå deira à la carte-meny med utvalde frukostalternativ, som kjennest som ein ekstra luksus. Romma opplevast store, sengene gode og badet heilt fantastisk.
📍Skostredet 14⁠Ekstern lenke

Hotell Opus XIV

Dette er for deg som verkeleg vil unne deg luksus på reisa. Opus XIV er eit boutique-hotell som byd på store, luftige rom med herlege senger, mørke, elegante tekstil og fargar som gjer romopplevinga lun. Og det beste frå to verder, både ein frukostbuffet og frukostmeny.
📍Vågsallmenningen 16⁠Ekstern lenke

Restaurantar som er verd å utforske i Bergen

Hoggorm: Bergens mest populære pizza

Denne pizzarestauranten ligg like ved Lille Lungegårdsvannet, ganske så sentralt. Her vel ein mellom kvit og raud pizza. Dei har dei originale variantane som pepperoni og margherita, og nokre spanande variantar som ndjua, villreker og bisque eller shiitake bratwurst og rapini. Pizzaane er store porsjonspizzaar og kostar mellom 270-300 kronar.

Lokalet deira er delt inn i fleire soner. Ved inngangen finn du ein intim og koseleg del med bord for to. Vidare inn i lokalet kan du velje å sitje rundt baren for ei meir uformell oppleving, eller i «garasjen» som har god plass til større grupper og selskap. I sommarsesongen frå mai til september har dei ei koseleg uteservering.
📍Nygårdsgaten 29⁠Ekstern lenke

TempoTempo: Fine dining til overkomelege prisar

På denne perla i byen får du godt samansette retter til ein grei penge. Perfekt om ein vil kose seg litt ekstra ein kveld. Dette er ein type fine dining, men for hipsterar. Det er avslappa stemning, stort luftig lokale med dempa lys og møblert med vintage-møblar. Ein stad ein kan kose seg lenge.

Menyen deira har alltid nokre spanande rettar, her merkar ein at kokkane har full kreativ fridom, og har kjærleik til mat. Prisane ligg på rundt 200–300 kroner for hovudretter, medan set–meny er på cirka 800 kroner.
📍Domkirkegaten 6A⁠Ekstern lenke

Banzha: Smaksrik oppleving frå Yunnan

Hos Banzha⁠Ekstern lenke får du servert autentisk kinesisk mat frå provinsen Yunnan. Vi prøvde set–menyen der ein får servert sju rettar. Rettane passa godt saman, var i ein ok prisklasse og gav meirsmak. Prisane varierer frå 219–299 kroner for forrettar og hovudmeny, medan set–menyane ligg på cirka 600-800 kroner.

Fasaden til Banzha ser ganske alminneleg ut når ein står i Neumanns gate, men når ein går inn i restauranten blir ein møtt med eit aldri så lite rosa «fargesplash». Veggane er dekorerte med ulike teppedesign og måla i lyserosa farge, ein stor kontrast til golvet som er knæsj raudt. Ein skikkeleg Instagram–venleg stad!
📍Neumanns gate 28⁠Ekstern lenke

Kogi: Autentisk Koreansk BBQ

Ein asiatisk himmel for deg som set pris på mykje smak og ein heil kveld rundt middagsbordet. På Kogi grillar du maten sjølv, dersom du bestiller hot pot eller rettar frå deira koreanske BBQ som blir servert med tradisjonelle siderettar. Her kan du prøve ut kjøt som bulgogi, iberico, eller wagyu. Dei har også autentiske rettar som suppe, ris- og nudelrettar. Prisane varierer frå 255–750 kroner, der det dyraste er wagyu og setmenyar.

Kogi har eit moderne lokale i minimalistisk stil. Restauranten er stor og går over to etasjar. Ved alle bord er det tilrettelagt med grill og ventilasjon som nesten kan sjå litt futuristisk ut. Ein stad der matopplevinga verkeleg står i sentrum.
📍Kong Oscars gate 29⁠Ekstern lenke

Daily Pot: Suppekjøken med råvarene i sesongen

Lyst på varm lunsj, eller ein litt lett middag? Då er Daily Pot den perfekte staden. Her serverer dei eit godt utval varme supper, bowls, sandwichar og nokre søte kaker. Her er det også gode alternativ for den som et vegetar eller vegansk. Her ligg rettane mellom 149–209 kroner.

Daily Pot finn du i eit koseleg trebygg som nesten kan sjå ut som ei stove utanfrå. Det er nedpå, koseleg og intimt.
📍Vaskerelven 21⁠Ekstern lenke

Trekroneren: Ikonisk pølsebu

Trekroneren er ein institusjon i Bergen by. Ingen kjipe grillpølser, berre skikkeleg gode pølser som fyller magen, enten du er på farta eller på veg heim ein sein kveld. Dette er ein pølsekiosk på steroidar, som tilbyd alt frå klassisk bratwurst til meir eksotiske variantar med mellom anna reinsdyr. Fysen eller skrubbsvolten, med pølser heilt opp til ein kvart kilo, er det lett å bli mett. Og du – saft byd dei på, om du spør fint.
📍Kong Oscars gate 1⁠Ekstern lenke

Bergen brunsj: Fargerike brunsjplankar

Hos Bergen Brunsj serverer dei brunsj inspirert av stadar på bokstaven B! Her ventar fargerike og spanande brunsjplankar frå Bali, Bahia Blanca og såklart; Bergen. De serverer også smørbrød og belgisk vaffel med fritert kylling og éin type salat. På drikkemenyen finn du alt frå herleg og frisk juice og brus til smakfulle og spanande mocktails. Prisane her ligg mellom 265–335 kroner.

På Bergen Brunsj sit gjengar og par i alle aldrar, det er tydeleg at her er det smakar som passar kvar og ein og eit lokale som gjev ein god atmosfære. Folk blir sitjande lenge og nyt både mat og lange samtalar.
📍Kaigaten 16⁠Ekstern lenke

Attraksjonar du bør sjekke ut

Fløyfjellet: Eitt av dei sju fjella

Eit «must» når himmelen er klår og blå, er å ta Fløibanen opp til Fløyfjellet⁠Ekstern lenke!
Dette er ein tur som tar cirka seks minutt, der du stig 320 meter over havet. På toppen av Fløyen har du ein nydeleg utsikt over dei seks andre fjella og Bergen by. Utsikta er spektakulær, og det finst fleire benkar der du kan slå deg ned og nyte han.

På toppen finn du Fløirestauranten⁠Ekstern lenke som serverer sesongbaserte råvarer med sterk lokal forankring i ikoniske omgjevnader fra 1925.

Fløistuen Café: Nydeleg bakverk

Er du fysen på bakverk og ein kopp kaffi, er Fløistuen Café⁠Ekstern lenke ein kjekk plass du finn på toppen. Her får du saftige kanelbollar, solskinnsbollar, is og påsmurd lunsj. Dei har enkel kaffiservering i form av traktekaffi og elles te og kakao av varm drikke.

Tips! Ta med bakst og kaffi som takeaway og nyt utsikta frå ein benk utandørs.
📍Fløyfjellet 1B⁠Ekstern lenke

Naturhistorisk Museum

Dette museet har store vitskaplege samlingar innan arkeologi, antropologi, kunst- og kulturhistorie, botanikk, geologi og zoologi. Her kan du vandre gjennom ulike tidsaldrar og fordjupe deg. I 2025 feirar Naturhistorisk museum 200 år og har jubileumsfeiring heile året med fleire ulike utstillingar, arrangement og føredrag for å feire.
📍Muséplassen 3⁠Ekstern lenke

Kode

På rekkje og rad langs Lille Lungegårdsvann ligg fire fantastiske bygningar som er fylte til randa av utrulege kunstverk. Desse bygningane utgjer store delar av Kode-museet, som byd på alt frå skulpturar og klassiske oljemåleri til meir utfordrande samtidskunst. Vår favoritt er kanskje den store samlinga med Munch-verk – kvifor dra til Oslo når du kan dra til Bergen?
📍På rekkje og rad langs Lille Lungegårdsvann, start med bygg “Rasmus Meyer”

Vakn opp til Bergen med tog eller buss

Nattoget til Bergen er eit rimeleg og tidssparande alternativ som kan passe godt om ein drar ein fredag kveld. Då får ein heile helga til å utforske Bergen by. Vy har fleire alternativ til reise om natta, du kan bestille Plussnatt, Sove eller Hvile med tog, eller nattbuss VY450 frå Oslo til Bergen i dobbeldekkar. PS: reiser du om natta, sparar du også pengar på hotell.