Noregs vakraste natur på Bergensbanen

Ein spektakulær naturoppleving

Ein tur med Bergensbanen gjev deg ei av dei mest spektakulære naturopplevingane i Europa. Bana kryssar Hardangervidda nasjonalpark, og går opp på Hardangerviddaplatået, det største høgfjellplatået i Europa.

Bergensbanen vart opna i 1909, og går over høgfjellet mellom Noregs to største byar, Oslo og Bergen. Bergensbanen er den høgastliggjande jernbanelinja i Nord-Europa. Les skildringa Lonely Planet har gjort av BergensbanenEkstern lenke.

Opplev den vakre naturen frå toget

Oslo–Geilo

Første etappe av reisa går frå Oslo til Geilo. Frå Drammen følger toget Drammenselva, ei framifrå lakseelv. Etter Vikersund vil du sjå den femte største innsjøen i Noreg, Tyrifjorden, som er 330 meter djup. Snart får du ditt første glimt av fjella, og etter kvart også vakker utsikt over Norefjell og Krøderfjorden. Området rundt Flå er eit eldgamalt bjørnehabitat.

Så langt har du reist gjennom eit tradisjonelt norsk innlandslandskap, med skog, elvar og no og då låge fjell. Etter Ål byrjar likevel landskapet å endre seg merkbart, ettersom Bergensbanen byrjar å stige.

Geilo–Voss

Neste etappe går frå Geilo til Voss som går over Hardangervidda – Nord-Europas største fjellplatå. Her finn du storslått natur, med Hardangervidda nasjonalpark i vest og Hallingskarvet nasjonalpark i aust. Hardangervidda nasjonalpark har Noregs største bestand av villrein, og her finst det meir enn 9 000 rein.

Les meir om Hardangervidda på visitnorway.comEkstern lenke.

Ved Hallingskeid vil du raskt merke at toget startar den unike nedstigninga si gjennom landskapet og ned mot havet. Legg merke til Gravhalstunnelen mellom Myrdal og Voss. Den er 5 311 meter lang og tok 10 år å bygge.

Voss–Bergen

Siste etappe på Bergensbanen er mellom Voss og Bergen. Strekninga tek deg ikkje høgare enn 57 meter over havet. Likevel byr denne delen av Bergensbanen på flotte naturopplevingar. Her kan du sjå både høge fjell, djupe dalar og tronge fjordar.

Aktivitetar langs Bergensbanen

Her finn du ei oversikt over nokre av stoppestadene kvar det kort veg frå toget til aktivitetar og friluftsmoglegheiter.

Ski og vintereventyr

• Voss tilbyr mange slags aktivitetar på ski. Her finn du både langrennsløyper og to av Vestlandets største skisenter.
• På Geilo har du langrennsløyper og alpinanlegg med 46 alpinløyper og 20 heiser lett tilgjengeleg frå togstasjonen.
• Frå Gol Stasjon kan du ta ein skyttelbuss til Hemsedal skisenter – eit av Noregs største skianlegg med bakkar, hopp og frikøyring i skog.

Fotturar

• Hopp av toget på Finse gå rett ut på høgfjellet. Vel mellom mange ulike turar på Hardangervidda – uansett sesong.
• Går du av på Myrdal finn du ulike turruter for alle ferdigheitsnivå. Her finn du også den idylliske Flåmsdalen.
• På Geilo kan du velje mellom fjellturar i alle vanskegrader. Geilo byr på alt frå toppturar og utsiktsturar til enklare familievennlege turar.
• Oppdag den vakre naturen på Voss til fots – anten du vil på kortare turar eller på tur i fleire dagar.

Sykling

• Rallarvegen er ein av Noregs mest populære sykkelvegar og lett tilgjengeleg frå Haugastøl, Finse og Myrdal stasjonar. Vegen er 80 kilometer lang er ein ganske krevjande sykkeltur med unik og flott natur.
• Går du av på Finse kan du velje mellom fleire sykkelruter på ulike lengder. Til dømes Finse–Flåm (53 km) eller Finse–Hallingskeid (21 km).
• Opplev Voss frå sykkelsetet! Her finn du mange ulike ruter både på asfalt, grus og fjellterreng. Har du ikkje med deg eigen sykkel kan du leige det her.

Andre friluftseventyr

• Voss er kjend for ekstremsport og tilbyr alt frå rafting, løypestreng og fallskjermhopping til elvepadling. Kvart år blir også arrangert Ekstremsportveko her – den største ekstremsportfestivalen i verda. Les meir om aktivitetar på Voss i guiden vår.
• Haugastøl på Hardangervidda er ein av dei beste stadene i verda for snøkiting. Her blir også kurs tilbode for dei som vil lære snøkiting.
• Nær Myrdal finn du Nordens lengste løypestreng som er 1318 meter lang. Flåm Zipline tek deg frå Vatnahalsen stasjon på Flåmsbana og ned til Flåmsdalen.

Attraksjonar

• Bjørneparken Flå ligg berre eit par kilometer frå Flå Stasjon. Her kjem du tett innpå mange av Noregs ville dyreartar.
• I nærleiken av Gol stasjon finn du ein nøyaktig kopi av Gol stavkyrkje frå 1200-talet. Den opphavlege kyrkja vart flytta til Norsk Folkemuseum i Oslo i 1884.
• Den majestetiske og vakre Hardangerjøkulen er Noregs sjette største isbre. Det næraste stoppet er Finse stasjon.

Flåmsbana

Flåmsbana går frå Myrdal stasjon på Bergensbanen og ned til Flåm. Den er ein av Noregs mest populære turistattraksjonar og blir rekna som ei av dei beste togreisene i verda. Turen tek rundt 1 time, og i Flåm kan du oppleve flott natur, aktivitetar, sightseeing og god mat.

Vil du ha den aller beste utsikta?

På Bergensbana får du best utsikt over Hardangervidda om du sit på venstre side frå Oslo, og høgre side frå Bergen (i køyretetninga). Vil du sjå vestlandske fjordlandskap, bør du sitje på høgre side frå Oslo, og venstre side frå Bergen (i køyretetninga). Bestiller du Flex-billett, kan du sjølv velje sete og sikre deg den beste utsikta.

Utsikt om vinteren

Om vinteren er det avgrensa med dagslys, så om du vil ha den beste utsikta, er det lurt å ta ein av togavgangane våre som går om morgonen eller formiddagen. På Hardangervidda er det dagslys omtrent klokka 09–15.