Oslo-perlene du bør vite om

3 ting å tenkje på før avreise

Godkjensla

Å reise med tog er behageleg og enkelt. Med toga slepp ein trafikkerte innfartsvegar, bompengar og stress med parkering.

Nyt reisa og utsikta frå toget, og ver utkvilt og klar for alt hovudstaden har å by på når toget er framme – midt i sentrum.

Hyggeleg for lommeboka

Er du tidleg ute med å bestille togturen, kan du spare pengar på reisa. Dei billigaste togbillettane går til deg som er tidleg ute. Du kan booke inntil 115 dagar før avreise.

Hopp av midt i sentrum

Enklare blir det ikkje. Det er noko eige med å rusle rett frå toget og inn på hotellet dersom du også har booka overnatting. Du finn tips til tre sentrale hotell i tre ulike prisklassar – litt lenger ned i denne artikkelen.

3 velværetips for å finne ro midt i byen

Oslo Badstueforening

Visste du at badstova Trosten⁠Ekstern lenke i Bjørvika nyleg vart kåra til eit av dei 100 beste reisemåla i verda i magasinet TIME? Likevel er det den hyggelege stemninga i dei små badstovehusa som gjer størst inntrykk. Hit kjem livsnytarar frå heile verda for å gjere det dei kan best – å nyte.

Daikai

Er du verkeleg på jakt etter zen-modus, bør du leggje turen innom Daikai⁠Ekstern lenke. Her vandrar du inn i ein asiatisk oase med behageleg spa-musikk og lukta av eteriske oljer. Eg valde tradisjonell kinesisk massasje og tør nesten påstå at eg kom ut som ein litt betre versjon av meg sjølv.

Vestkantbadet

I underetasjen på det populære hotellet Sommerro finn du Vestkantbadet⁠Ekstern lenke – eit historisk badeanlegg frå 1932. Badet har eit unikt og freda interiør i art deco-stil med oppvarma basseng, kald kulp og badstove. Dei har ope for drop-in-timar, også for dei som ikkje bur på hotellet.

3 utsikter du vil elske

Kranen

Klar for magesug? Ta heisen opp til toppen av Munchmuseet for den råaste utsikta i byen. Her finn du også restauranten Bistro Tolvte⁠Ekstern lenke som blir beskrive som «ein slags europeisk bistro sett gjennom rause, amerikanske briller». På menyen finn du mellom anna østers, skagentoast og full à la carte-meny.

Byens Tak

Toppen av Folketeaterbygningen på Youngstorget blir beskrive som den nye møtestaden i byen for arkitektur og bykultur. Byens Tak⁠Ekstern lenke er ein perfekt og avslappande stad for å nyte gode samtalar.

Torgterrassen

«Wow! Denne Oslo-perla må alle få vite om!» Midt i byen, berre eit steinkast frå Karl Johans gate, finn du min nye favoritt: Torgterrassen⁠Ekstern lenke.

3 gratis opplevingar

Botanisk Hage

I Botanisk hage ⁠Ekstern lenkekan du la deg imponere av over 4500 planteslag frå heile verda. Ein spasertur her er som å sjå naturen sitt eige kunstverk.

Oslos hovudbibliotek, Deichman

Biblioteket⁠Ekstern lenke har stadig gratis arrangement som føredrag, kino, kunstutstillingar og forfattarsamtalar. Har du god tid før du skal ta toget heim? Då kan du slå deg ned for å kvile med ei god bok.

Akershus festning

Festningen⁠Ekstern lenke finn du midt i sentrum, og her kan du kan utforske Oslos spennande historie og finne stader å sitje for å kose deg i sola med utsikt til Aker Brygge.

3 stader å ete fantastisk mat

Hos Peder

Ah, så herleg med europeisk storbykjensle midt på Grünerløkka. Hos Peder⁠Ekstern lenke er det trongt og høglydt, men god service og vedunderlege smakar basert på norske råvarer. Ikkje gå glipp av blåskjela med asiatisk touch.

Khanateria

Oh, la la. Bli med på ein indisk smaksfest⁠Ekstern lenke! Vi snakkar masala street snacks og indisk tapas med ein moderne og kreativ vri. Mellom anna får du green peas flambert over kol. Rettene er meinte for å delast, og du kan også gå for smaksmeny – utan særleg avskrekkande prisar.

Lille Betong

Bollefeberen herjar i hovudstaden, og mange står gjerne i timevis i kø for favorittbollane sine. Vi var så heldige å sleppe lang ventetid då vi kom til Lille Betong⁠Ekstern lenke i Bjørvika etter lunsjtid. Men herregud ... Det er lett å forstå kvifor folk er begeistra for denne smakfulle bollekunsten.

Hugs å sjekke ut Bjørvika⁠Ekstern lenke som har vorte ein levande og spennande bydel med alle kunstgalleria sine, fjonge butikkar og spennande restaurantar.

3 hotell i 3 prisklassar

Amerikalinjen

Hello og ja, takk! Rett ved sidan av Jernbanetorget finn du hotellet som tek deg såg nær New York-kjensla som du kjem i Oslo: Amerikalinjen⁠Ekstern lenke. Gjer deg klar for jazzkveldar, ein av dei beste frukostane i byen, lukta av luksussåpe og omtanke i kvar minste vesle detalj.

Comfort Hotel Karl Johan

Berre fem minutts gåtur frå Oslo sentralstasjon kan du rusle inn i ein grøn og hyggeleg bakgard på Comfort Hotel på Karl Johan⁠Ekstern lenke. Her får du praktisk og komfortabel overnatting til hyggelege prisar midt i sentrum.

Citybox Oslo

Ja, det er mogleg å få eit enkelt dobbeltrom midt i sentrum til rundt 1000-lappen. På Citybox⁠Ekstern lenke er det sjølvbetjent innsjekking, skandinavisk design på romma, komfortable senger og gratis internett. Ønskjer du å gjere opphaldet i storbyen endå rimelegare, kan du lage eit enkelt måltid på gjestekjøkkenet til hotellet.

Oslo er ein levande festivalby, og ofte blir det arrangert konsertar. Sjekk ut Visit Oslo og søk etter arrangement i «Hva skjer-kalenderen⁠Ekstern lenke» som matchar togreisa di.