Dagstur til Göteborg

Innkomst

Du går av midt i byen, og her er det berre å ta for seg. Ingen bilkø, og du slepp å bruke tid på å finne parkeringsplass (og å betale for denne). Det er lett å kome seg rundt i byen, enten til fots eller med kollektivtransport. Det er ein av grunnane til at mange vel Göteborg også for korte turar. Hopp på første spårvagn (trikk) til hotellet – eller til første post på programmet.

Meir enn karusellar i Liseberg

Liseberg er Nordens største underhaldningspark, og for mange besøkjande er det sjølvsagt å ta turen innom når du først er i Göteborg. Entrébilletten kostar ikkje mykje, så ein tur inn passar godt også for deg som ikkje likar karusellar.

På Liseberg kan du observere folkelivet, smake på herleg mat og drikke, eller nyte dei siste solstrålane i sommar medan du spaserer i koselege smågater eller slappar av i dei mange små, grøne lungene i parken. Midt på sommaren vrimlar det av folk på Liseberg, men mot slutten av august og i september møter du ein park med lågare og hyggelegare puls.

Koselege Haga

Haga er eit av dei mest idylliske områda i Göteborg. Her finn du fargerike gater som florerer av butikkar med handlaga varer, med småprat over disken og ordentleg kvalitet på det som blir selt. I Haga får du verkeleg den svenske stemninga. Topp det heile med ein gigantisk kanelsnurr: Hagabullen er ikonisk, og han er gigantisk! Dette er absolutt noko å prøve, ikkje berre er bollen gedigen – han er også saftig og god. Det er fleire kafear i Haga som sel stor kanelbolle, men den originale Hagabullen får du på Café Husaren. PS: Ein bolle kan fint mette fleire magar, så bestill gjerne éin på deling.

På Café Husaren finn du også andre typar søtsaker som Tiramisu, Snickerskake, fastelavnsbolle, muffins, marengs og mykje anna. Dei har også mykje å freiste med til eit kaldt eller varmt lunsjmåltid, som salatar, påsmurde rundstykke, pai, lasagne, suppe og toast.

Overnatting: tre tilrådingar rundt om i byen

Göteborg er ein perfekt by for dagstur, men kvifor ikkje forlengje turen og vere ei natt eller to der? Byen har mange fine hotell. Dette er tre av våre favorittar.

Elite Plaza Hotell

Eit staseleg nyrenessansebygg gjort om til eit fasjonabelt hotell. Her får du førsteklasses service i eit flott bygg – midt i byen. Du kjem til å kjenne deg som ei stjerne når du går ut av hotellet på den raude løparen og vidare ut i Göteborgs gater. Passar spesielt godt for deg som vil ha gangavstand til det meste og samtidig bu veldig bra.
Prisnivå: Middels

Jacy's

Eit imponerande, nyare hotell bak Ullevi, litt utanfor sjølve sentrumskjernen. Hotellet er nesten som eit resort midt i storbyen. Jacy's kan by på spa, fleire basseng både ute og inne, barar, restaurantar og ein blomsterbutikk(!). Her får du verkeleg luksuskjensla – og planlegg du litt fram i tid, treng det ikkje å koste all verda. Passar ekstra godt for deg som vil skjemme deg bort og ta livet heilt med ro. Er også perfekt for eit romantisk avbrekk.
Prisnivå: Litt høgt

Lisebergsbyn

Vil du velje noko enklare og meir budsjettvenleg, utan at det går ut over hygga? I Lisebergsbyn bur du i koselege «stugor» (hytter), i deira B&B eller på vandrarheimen, ca. 10 minutt med trikk frå sentrum. Her finn du rimeleg overnatting i naturskjøne omgjevnader. Lisebergsbyn passar deg som ikkje må bu midt i sentrum, og som gjerne heller vil bruke meir pengar på gode matopplevingar – eller karusellar på Liseberg.
Prisnivå: Lågt

Tropisk stemning i Palmehuset

Midt i byen finn du Trädgårdsföreningen, ein liten botanisk hage. Ikkje berre er det eit nydeleg parkanlegg for å nyte late seinsommardagar, han har også ein pittoresk oase av eit palmehus. I Palmehuset er temperaturen alltid lun og varm, og med eksotiske dufter frå plantane er det lett å drøyme seg bort til sørlegare strok. Eit perfekt avbrekk midt i byen, når du vil bort frå asfalt og trafikk.

Tips! I Göteborg finn du også ein langt større, botanisk hage, Göteborgs botaniska trädgård. Perfekt om du vil ha ei litt lengre utflukt. Ta trikk 1, 2 eller 7 frå sentrum – det tek berre eit kvarter.

Skjulte perler på vintageshopping

Å handle brukt er som eit slags kinderegg: det gjer godt for kloden, for lommeboka – og ikkje minst kan du gjere unike kupp. Göteborg kan freiste med mange ulike bruktbutikkar, stort utval og gode prisar. Det er også langt meir sosialt og triveleg å handle vintage enn å gå i folketette kjøpesenter. Vi har samla tre favorittar som alle ligg i området rundt Järntorget (Pustarvik/Haga):

Myrorna

Fire etasjar bruktglede. I denne svære bruktbutikken finn du klede, kunst, aksessoarar og krimskrams til ein billig penge. Myrorna opplevast på mange måtar som eit varemagasin for vintage. Her er det berre å leite etter antrekket som kjennest rett for akkurat deg.

Göteborg Dödsbo

Nydeleg utval trass eit litt heftig namn. I ei sidegate i Haga finn du denne perla av ein butikk. Her finn du nøye kuraterte bruktskattar, perfekt for deg som er på jakt etter noko unikt av høg kvalitet. Spesielt godt likar vi utvalet i svenskprodusert keramikk og servise.

Arkivet

For deg med skarpt auge for detaljar og mote. Arkivet er ein moderne second hand-butikk: Her er dei nøye i utveljinga av klede som er skikka til å bli brukte vidare, og som framleis held moten. Måten dei stiller ut kleda viser ein kjærleik for brukt: stroke, sortert etter fargar og samla på stativ i kvar sin kategori. Her får du i hovudsak dameklede, vesker og anna tilbehøyr. Absolutt verd ein stopp på shoppingrunden.

Frå Oslo til Göteborg raskt og billeg

Du kan ta både tog og buss frå Oslo sentrum til Göteborg sentrum. Du kjem då midt i sentrumskjernen.

Vi køyrer tog til Göteborg åtte gongar om dagen. Dessutan har vi studentrabatt, honnørrabatt og barnerabatt på togbillettane våre til Göteborg.

Skal du ta buss kan du velje komfortklasse Plus der du får eit sete med betre beinplass, straumuttak ved plassen og høve til å velje enkeltsete på eiga rad.

God tur 💚