Sommarbyen Malmö

Trendy, overraskande og moderne by

Mange har nok høyrt om Malmö, men veit lite om det fantastiske tilbodet som finst i denne perla av ein sommarby – sandstrender, sykkelparadis og byliv.

Lunsj i bakgården hos Ruths

Denne populære restauranten, som òg har fått tildelt ein Bib Gourmand av MICHELIN-guiden, byr på ein flott servering i bakgården, og eit luftig lokale med open kjøkkenløysing. Bib Gourmand-utmerkinga tyder ikkje at prisane er høge, men at restauranten utmerkjer seg ved å tilby trerettars til ein god pris og av høg kvalitet. Hos Ruths⁠Ekstern lenke kan du sitje ute i den herlege bakgarden og få servert frukost, brunsj, lunsj, middag og fika.

Vi kan tilrå å leggje lunsjen hit og plukke ut rettar de kan dele. Dei har òg ein ferdig set-meny med kjøkkenet sitt val av forrett, hovudrett, kaffi og fika. Restauranten ligg berre sju minuttars gange frå Malmö sentralstasjon.

📍Mäster Johansgatan 11⁠Ekstern lenke

Aster – ei gøymd perle i eit fabrikklokale

I eit gamalt varehus like ved kaia som tidlegare husa byens skipsverft, har denne restauranten vakse fram. Interiøret i lokalet er i harmoni med det industrielle og rustikke bygget. Dei har òg ein nydeleg uteservering pynta med plantar, lyslenker og fleire hyggelege sitjegrupper.

Aster⁠Ekstern lenke har fokus på velbalanserte smårettar som vert delte rundt bordet. Rettane deira er nøye samansette av smakar som skaper balanse og unike kombinasjonar. Det er ei lita meny, men kombinasjonane set smaksløkane i sving. Prisane er ikkje avskrekkande i høve til kvaliteten. Aster ligg 15 minutt unna togstasjonen.

📍Jagaregatan 6⁠Ekstern lenke

Slottsträdgården i hjartet av Malmö

Denne nydelege hagen er ein open, økologisk hage midt i Malmö. Her kan du gå i timevis og sjå på fleire ulike temahagar som japansk, linné og klimahagar. Om du ikkje vil sjekke inn, kan du i alle fall sjekke ut insektshotellet på omtrent 25 kubikkmeter som finst i hagen, kanskje eitt av dei største i verda? Det er òg mogleg å vere med på arrangement som ulike guida turar og visingar av forskjellige delar av hagen.

Treng du ei forfriskande pause i løpet av besøket, bør du gå til Slottsträdgårdens Kafé. Her kan du slå deg ned på den store uteserveringa omgitt av nydelege blomar og plantar. Dei har òg vakre sitjeplassar inne i det møblerte drivhuset, og ein fin innandørs kafédel.

Slottsträdgårdens Kafé⁠Ekstern lenke brukar det hagen kan gje i sesongane og baserer maten på økologiske, lokalproduserte og klimasmarte råvarer. Menyen deira byr på fingermat, fika og større lunsjrettar som smørbrød, salatar og pølser med tilbehøyr.

📍Malmöhusvägen 4⁠Ekstern lenke

Folkets park

Dette er ein 130 år gamal folkepark som er open heile døgnet og heile året, og den er perfekt for både barnefamiliar og vener. I Folkets park finn du fleire restaurantar, kioskar og kaféar, i tillegg til minigolf, reptilpark, plaskedam, scener, skateramper, leikeplassar, boulebane, arrangement og mykje anna spennande å oppleve!

Folkets park ligg ein halvtimes gåavstand (2,3 kilometer) frå togstasjonen, men leiger du ein sykkel er det berre ei 12 minuttars sykkeltur.

📍Amiralsgatan 35⁠Ekstern lenke

Opplev storbyens attraksjonar med sykkel

Landskapet er for det meste flatt, noko som gjer Malmö til ein utruleg flott sykkelby. Du kan kome deg overalt ettersom byen har satsa systematisk på utbygging av sykkelinfrastruktur dei siste åra. Ved togstasjonen finn du ein stor sykkelparkeringsplass, og leige av sykkel er ikkje vanskeleg å finne rundt om i byen.

Ribersborgsstranden

Denne flotte stranda på 1,5 kilometer er Malmös mest vitja strand – med god grunn! Ribban, som dei lokale kallar ho, legg til rette for aktivitetar som sandvolleyball, utegym, fotball, basketball og utleige av SUP-brett og kajakk. Stranda har òg toalettfasilitetar, dusjar og tilrettelagde grillplassar. Det er eigne område for naturistbading, og hundepark og -bad.

På Ribban finn du òg det populære Ribersborgs Kallbadhus⁠Ekstern lenke. Dei kan freiste med drop-in på seks badstover, bestilling av massasje og ein restaurant med ei generøs meny. Her får du ei nydeleg utsikt over havet som kan opplevast gjennom alle årstider.

📍Ridersborsstranden⁠Ekstern lenke

📍Ribersborgs Kallbadhus⁠Ekstern lenke

Öresundsbron

Syklar du vidare forbi Ribersborgsstranden, bør du halde fram til utsiktspunktet for Öresundsbron. Ein verkeleg flott sykkeltur langs kysten som endar med synet av Nordens lengste bru- og tunellsamband på 15,9 kilometer. Øresundssambandet strekkjer seg frå Sverige over til Danmark. Så dersom du ynskjer ein liten dagstur til Danmark, kan du setje deg på toget i Malmö og vere framme i København på 40 minutt.

📍Öresundsbron utkikkspunkt⁠Ekstern lenke

Turning Torso

Den 190 meter høge bygningen er verdt å ta sykkelturen til. Skyskraparen er den tredje høgaste i Skandinavia og har heile 54 etasjar med ein 90 graders vri, litt av eit syn når ein kan sjå han bevege seg med vinden.

📍Storgatan 43⁠Ekstern lenke

Reis vidare ut i Europa

Frå Malmö er vegen kort vidare ut i Europa! Det er fleire gode samband med nattog og dagtog til både Hamburg og Berlin frå Malmö C.