Punktlegskap

Toga

Eit tog er i rute når det kjem til endestasjonen innanfor 3:59 minutt av oppgitt tid. For langdistansetog er marginen 5:59 minutt.

Det er Bane NOR som eig infrastrukturen, og saman gjer vi alt vi kan for at toga våre skal vere presise. Sjå statistikk for punktlege ruter på banenor.no⁠Ekstern lenke.

Det er mange grunnar til at eit tog kan vere forseinka, men dei viktigaste årsakene kan delast i tre grupper:

• Feil på skjener og signalanlegg
• For lange opphald på stasjonen
• Tekniske feil på toga

Feil på skjener og signalanlegg

Bane NOR er ansvarleg for infrastruktur og vedlikehald. Feil på skjener og signalanlegg er den viktigaste årsaka til forseinkingar. Signalfeil betyr ikkje at det er feil på signalanlegget, men at anlegget varslar om ein feil. Det kan for eksempel vere kortslutningar, eller is og stein i sporvekslaren. Vêr, vind og andre uventa hendingar kan også skape problem for togtrafikken.

Bane NOR jobbar kvar dag med å gjere skjenegangane og signalsystema betre, slik at forseinkingane blir så få og så korte som mogleg.

I tillegg har dei starta arbeidet med å byte ut signalanlegget. Det nye systemet heiter ERTMS, og skal redusere talet på signalfeil kraftig når det blir tatt i bruk. ERTMS er allereie i drift på Østfoldbana mellom Ski og Mysen/Rakkestad, og denne linja er no blant dei mest punktlege strekningane i landet.

Sjå Bane NOR si oversikt over planlagt arbeid⁠Ekstern lenke

For lange opphald på stasjonen

Dette er nokre av dei vanlegaste årsakene til at toga brukar lengre tid enn planlagt på stasjonane:

• Tronge dører og trappegangar som gjer det vanskelegare å kome seg av og på
• Spesialbagasje, barnevogner og liknande, som det tek ekstra tid å få om bord
• Passasjerar som prøver å gå på toget før alle har kome seg av

Dei siste åra har denne typen forseinkingar gått kraftig ned. Det skuldast først og fremst dei nye Flirt-toga, som gjer det enklare å gå av og på toget.
I tillegg får alle konduktørane og lokførarane opplæring i korleis dei kan gjere opphalda så smidige og effektive som mogleg.

Tekniske feil på toga

Tekniske feil på tog og materiell er også opphav til forseinkingar og innstillingar. Tog i Noreg blir utsette for ekstreme påkjenningar. Frå bratte og krappe skjenegangar til is, fukt og store temperatursvingingar. Dette gir slitasje på toga, spesielt på dei eldste togsetta våre.

Med ei rekkje nye og moderne tog har talet på forseinkingar gått ned. For dei gamle toga har vi no innført eit nytt vedlikehaldsprogram, og dette har resultert i færre forseinkingar.

Bussane

I 2022 var 94,4 prosent av bussane i rute. Vi skal alltid gjere vårt beste for at du skal kome fram i rett tid. Skulle det likevel bli forseinkingar eller annan leveransesvikt, skal vi:

• gi deg best mogleg informasjon om kva som skjer,
• så tidleg som mogleg gi deg informasjon om alternativ transport / alternative reisevegar, og
• setje opp alternativ transport så langt det er praktisk mogleg